Zunftspiel 

Uff Aareegig vom laider verstorbene Altvorgsetzte Joggi Grieninger hänn aigeni Zumftbrieder wo pfyffe und drummle , d Basler Mittwuch Gsellschaft als Zumftspiil abgleest, wobyy natyrlig hitte au no BMG’ler derbyy sinn. Sunscht sinn mer us allergattige Glyyge und Grubbe zämmegsetzt.Mer hänn ys e Répertoire zuegleggt mit Märsch wo ainigermasse der glyych Drummeltäggscht hänn. D’Proobe hänn am Afang im Turmzimmer vom Wirtshuus Laiezorn stattgfunde. Jetze sinn mer scho vyyli  Johr Gascht im Käller vo dr Rumpel Clique im Pfeffergässli.  

Am Samschtig der 19. März 1977, am Zumftässe im Saal vom Wirtshuus Rialto, isch s’aige Spiil  s’erscht Mool  uffträtte. Aagleggt mit wysse Hemmli, schwarze Hoose und ere gääl/roote Schläggstängel Grawatte.

Sytt denne sinn mer an jeedem Zumftässe, an jeeder Zumftfahrt und an spezielle Aaloss, derbyy.

Mir fraie is immer uff Zunftbrieder, wo Interässe hänn bi uns mitzmache. Wenn Du Di aagsproche fiehlsch, denn mäld Di doch bim Spielchef.

Patrice Cron, Spielchef